' Artemartiais '

Working With Artemartiais


DEKLARASAUN KUNJUNTA
"Persaudaraan Setia Hati Terate (PSHT)-IKS.PTL Kera Sakti" Distritu Baucau
Baucau, Sabadau, 20 fulan Novembru tinan 2010

Haree ba konflitu-violensia ne'ebe naruk entre membru organizasaun arte marsiais PSHT no Kera Sakti iha Distrito Baucau ne'ebe sai mos preukupasaun ba komunidade, tanba ne'e ita hare'e katak presiza buka solusaun atu minimiza ka reduz.

Bazei ba mini dialogu ne'ebe mak realiza ona iha bairo Diwake no Buasare iha loron 18 no 19 fulan Novembru tinan 2010, no mos dialogu konjunta ne'ebe realiza iha loron 20 de Novembru tinan 2010, no ikus mai hetan konkluzaun katak:

click DEKLARASAUN KUNJUNTA  for PDF file


I. KONTESTU KONFLITU NO VIOLENSIA:
  1. Fator menus kapasidade ita nian, liu-liu kapasidade lideransa sira halo konfrontasaun ida ne'e eskalativu ba iha divizionizmu no violensia komunal. Komunidade sai fahe-malu tamba sentimentu tauk no amiasadu.
  2. Komunidade iha fatin Diwake, Buasare, Teulale, Boile, Wairage no fatin seluk tan sira nia movimentu ladun livre, liu-liu ba atividade peska ba tasi no halo negosiu iha merkadu.
  3. Iha tinan 3 ikus ne'e, waihira tama iha finadu, komunidade sira sempre diskontenti tamba iha simiteiru Bibidala sempre mosu konfrontasaun ebertu entre membru organizasaun arte marsiais.
  4. Iha indikasaun katak iha ameasa ba taka dalan iha parte wairage ne'ebe dalan ne'e hanesan dalan publiku no uniku liga ba Baucau vila. Iha mos indikasaun ameasa taka dalan ne'ebe ligasaun ba taci nian.
  5. Maski komunidade Diwake no buasare ne'e iha ligasaun familia hanesan feto-san no umane, maibe sira tengki hakotu provizoriamente tamba konflitus entre membru organizasaun 2 (PSHT no Kera Sakti):
  6. Problema partikular hanesan iha asaun brutalizmu individual, konsidera mos hanesan fali problema arte marsiais nian, tamba durante ne'e iha ona konflitu entre membru organizasaun arte marsiais PSHT no Kera Sakti;
  7. Iha lamentasaun balun hosi komunidade no membru arte marsiais hasoru azente PNTL balun tamba wainhira halo atuasaun tarde no deskumfia adere ba Organizasaun Arte marsiais balun.
  8. Iha mos ema individual ne'ebe la pertensia ba organizasaun arte marsiais, mak halo provokasau no asaun seluk maibe komunidade sempre jeneraliza fali ba problema arte marsiais  nian;
  9. Iha mos lamentasaun hosi komunidade katak lider arte marsiais balu iha oin ko'alia ibun mida maibe iha kotuk halo fali buat seluk;
  10. Lamentasaun balun hosi komunidade katak membru arte marsiais balun aplika no pratika arte marsiais nia hasoru fali ema inosenti sira.
  11. Kazu krime pasado ne'ebe prosesu la-la'o sai  provokasaun hodi hamosu konflitu no violensia foun, tamba ne'e rezulta suspeitu bele sai fali vitima no vitima sai fali suspeitu.
  12. Konsekuensia hosi konflitu no violensia ne'e maka rezulta kanek, estragus sasan, iha limitasaun ba movimentu entre membru organizasaun arte marsiais no komunidade.

II. SAIDA MAK ITA HAKARAK HALO
  1. Ami nu'udar lideransa, hamutuk ho elementu sira hotu husi organizasaun artes marsiais Persaudaraan Setia Hati Terate (PSHT) no organizasaun IKS-PTL Kera Sakti Distrito Baucau hatudu ami nia komitmentu hod hatan "prontu tengki dame-malu";
  2. Ami, firmi hodi hateten katak "lakohi sai-tan instrumentu ba interese politiku lideransa no interese partidu politiku sira;
  3. Ami, husu no bolu atensaun ba elementu sira hotu husi PSHT-Kera Sakti atu ativu hakmatek, hadame-malu, respeitu-malu no ativu iha modalidade Arte no Disportu hanesan kapital ba dezemvolvimentu nasional no mos kria ispiritu unidade nasional;
  4. Ami firmi, hodi deklara iha ne'e katak nu'udar ema Timor-oan, labele halo diskriminasaun ba malu, halakon lia-fuan ne'ebe akuza organizasaun artes marsiais sira seluk no mos lia-fuan mal trata sira hasoru inan aman, familia no autoridade sira ka ema sira nebe inosente.
  5. Ami, rekuinese katak situasaun krize ne'ebe provoka konflitu ho violensia durante ne'e lori konsekuensia negativu barak, mak hanesan iha maun-alin balun kanek, no familia sira lakon direitu ba moris seguru no mos liberdade ba movimentu. ba ida ne'e ami, "HUSU DISKULPA BA IMI HOTU"
  6. Ami deklara katak ba aktu violensia ne'ebe akontese durante ne'e direita ka in-direita involve elementu organizasaun PSHT-Kera Sakti, ida ne'e hanesan aktu krimi ne'ebe sai responsablidade ba pesoal idak-idak nian. ne'e signifika katak la'os kulpa no responsabilidade organizasaun nian;
III. SAIDA MAK HAKARAK AKONTESE IHA OIN MAI:
  1. Ami sei hamutuk ho ami nia inan-aman no familia no lia-na'in sira hodi halo seremonia juramentu kultural hanesan meus ida hodi hametin liu tan ami nia deklarasaun dame-malu ne'e;
  2. Ami husu tulun husi governu Timor-Leste organizasaun sosiedade sivil hanesan Instituisaun ITA ba PAZ no orgranizasaun naun governamental (ONG) sira seluk hodi apoiu ba ami nia inisiativu dezenvolvimentu organizasaun PSHT-Kera Sakti liu hosi FESTIL Distritu Baucau nian;
  3. Komesa ohin ba oin, ami sei halo reformasaun ba ami nia organizasaun liu husi hadi'a jestaun lideransa, kada organizasaun nian
  4. Atu apoiu ba ami no dezenvolve situasaun hakmatek iha sosiedade, ami husu ba elementu instituisaun sira hanesan Polisia Nasional Timor-Leste (PNTL) atu ativu atende ba kualker aktu violensia liu husi hatudu imparsialidade, neutralidade no profesionalismu durante hala'o knar;
  5. Ikus, ami deklara katak "PSHT-Kera Sakti" HADAME MALU NO HADOMI-MALU HO DOMIN NO FIAR BA MALU komesa agora no iha futuru oin-mai;